Swjedźenske lěto 2018 wěnuje so słowjansko-němskemu poćahej

Budyšin (SN/CoR). Zo bu Budyšin w lěće 1002 w chronice Thietmara von Merseburga prěni raz naspomnjeny, to wěmy najpozdźišo wot wulkeho swjedźenja sprjewineho města k 1 000. róčnicy wobstaća w lěće 2002. Zo pak zhladujemy klětu na 1 000 lět Budyskeho měra, je lědma někomu znate. To ma so nětko změnić. Wšako chce Budyšin zhromadnje z partnerskimi městami a dalšimi partnerami swjedźenske lěto z dohromady 27 jednotliwymi zarjadowanjemi přewjesć, a to hač do nazymy 2019. Kaž tež hižo při prěnim naspomnjenju města hraje pólski wjerch a prěni kral Pólskeje Bolesław Chrobry tež w nowym jubileju wažnu rólu. Wšako podpisaštaj wón a romsko-němski kejžor Heinrich II. 30. januara 1018 na Budyskim hrodźe zrěčenje wo Budyskim měrje – a to bě takrjec prěni historiski měr mjez Polakami a Němcami, kotryž přetorhny wojowanja wo Łužicy serbskeju kmjenow Milčanow a Łužičanow na někotre lěta.