Budyšin (SN/jž). Zajim za notowy material k instrumentalnemu přewodej serbskich spěwow přiběra. To wobkruća hudźbutwórc Měrćin Weclich. Na wjacore naprašowanja hudźbnje zajimowanych bě Kukowčan spočatk měsaca wudał zešiwk „Zaklinči-li pišćałka, zhrěje mi so wutroba“, wobsahowacy noty 40 pěsnjow za přewod z blokowej fletu a klawěrom. „Dale a wjac dźěći chce so hudźbnje wuspytać. Tajki zajim njeměli zanjechać, ale mamy jón spěchować. To kaž tež naprašowanje staršich bě mi pohon, zběrku wudać“, rjekny komponist našemu wječornikej.
Wobšěrny poskitk serbskeho notoweho materiala maja mjez druhim w Budyskej Smolerjec kniharni. Kaž klasiske twórby Korle Awgusta Kocora a kompozicije Jana Pawoła Nagela předawaja tam runje tak noty k modernym twórbam. Mjez nimi su na přikład hudźbne kruchi wot Jana Cyža a Liany Bertók. Dale poskića kniharnja material za smyčkowe a dujerske instrumenty, samo za eksotiske kaž harfu abo mandolinu – wuběr je dosć wulki. Na spěwarjow tohorunja njejsu zabyli. Bohaty je mjenujcy tež poskitk notow za solistow, duety, tercety, kwartety a za chóry.
