Tež jejkadebjenje woblubowane zarjadowanje
Kamjenc (SN/mwe). Ze zajimawymi a wotměnjawymi poskitkami Kamjenski Muzej zapadneje Łužicy wosebje swójby do swojeho domu wabi. „To su wospjet a znowa njedawne zymske prózdniny pokazali. Swójby z dźěćimi rady naše akciske dny a prózdninske poskitki wužiwaja. To nastupa tež dźěćace narodniny. Wone su dožiwjenjowpołne a wobsahuja přeco tež praktiski dźěl“, rozłožuje Ines Müller-Spindler, zamołwita za zjawnostne dźěło. „Ze swójbnymi kaž tež přećelemi móža holcy a hólcy na narodninach w muzeju rjane hodźinki dožiwić.“
Nětko přihotuja tam wustajeńcu z wobrazami Wojerowčanki Gudrun Otto a ze skulpturami Cvetanki Kiriloweje-Schnorrbusch z Połčnicy. Sobotu budźe wotewrjenje. Wobě wuměłči čerpatej swoje inspiracije z přirody kaž tež z dožiwjenjow z ludźimi. A zhromadnje wonej nětko swoje mólby, grafiki a skulptury w elementariju wustajitej.