Dorostowej myće a referataj

Donnerstag, 15. März 2018
Artikel bewerten
(0 Stimmen)

Zajutřišim, sobotu, wotměje Maćica Serbska swoju hłownu zhromadźiznu. Bosćan Nawka je so z předsydu serbskeho wědomostneho towarstwa Jurjom Łušćanskim rozmołwjał.

Knježe Łušćanski, kajke su ćežišća hłowneje zhromadźizny Maćicy Serbskeje?

J. Łušćanski: Po zwučenym wašnju najprjedy předsydstwo, potom pokładnik a skónčnje nawody jednotliwych sekcijow, rěčneju komisijow a pomnikoweho wuběrka swoje rozprawy přednjesu. Kaž dnjowy porjad dale předwidźi, budźemy so wo přichodnym dźěle našeho towarstwa rozmołwjeć. Někotre lěta hižo spožči Maćica tři připóznawanske myta, a to Hórnikowe, Mukowe a Šwjelowe. Wjeselimy so, zo móžemy lětsa Hórnikowe a Šwjelowe Myto přepodać.

Na dnjowym porjedźe zhromadźizny stej přednoškaj připowědźenej. Kotre temy ­referentaj wobjednawataj?

J. Łušćanski: Najprjedy porěči naš čěski čłon docent dr. Petr Kaleta, kiž je w nakładnistwje Praskeje Karloweje uniwersity knihu „Serbja w Ludowej komorje NDR 1949 – 1989“ wudał. Předsyda Maśicy Serbskeje dr. Pětš Šurman přednošuje wo skutkowanju a wuznamje ­Maśicy Serbskeje a jeje zwiskach k hornjoserbskej Maćicy.

To stej zajimawej temje. Smědźa tež nječłonojo připosłuchać?

J. Łušćanski: So wě, kaž zasadnje kóžde zarjadowanje Maćicy budźe tež sobotne zjawne a wjeselimy so na kóždeho wopytarja, kiž so za stawizny zajimuje. A skedźbnić chcu tohorunja na přednoški we „Wjelbiku“, kotrež stawizniska ­sekcija prawidłownje přewjeduje.

Kajki je staw nastupajo dorost?

J. Łušćanski: Je wšak znate, zo Maćica njeje žadyn młodźinski klub. Z mjenowanymi mytami so na přikład wo młodźinu prócujemy. Konkretnje su lětsa třo čłonojo Maćicy přistupili, wšitcy tójšto młódši hač ja (so smějkoce).

Što Maćica přichodnje planuje?

J. Łušćanski: Wobdźělimy so na Serbskich kulturnych dnjach w Liberecskim kraju a kónc lěta počesćimy Jana Rawpa z komornym koncertom składnostnje jeho 90. posmjertnych narodnin.

Wutrobny dźak!

Veröffentlicht in Rozmołwa
Bitte anmelden, um einen Kommentar zu posten

Anzeige