Spěchowanje 2020 a problematiske poprjancy kulturny konwent zaběrali

Mužakow (SN/bn). Kulturny konwent zaměroweho zwjazka Kulturny rum Hornja Łužica-Delnja Šleska je na swojim 110. posedźenju zawčerawšim na Mužakowskim hrodźe wšitke wobzamknjenske namjety jednohłósnje přiwzał. Jeničce na spě­chowanje wot lěta 2020 njeje so gremij dojednał a temu tuž přestorčił. Dalši dypk zetkanja, wo kotrymž su diskutowali, bě prašenje, kak a w kotrej měrje kulturny konwent powabjenje Žitawy wo titul „Europska kulturna stolica 2025“ podpěruje. Wo móžnej kooperaciji chcedźa so dale rozmołwjeć.

Prěni namjet po zwěsćenju wobzamknjenjakmanosće a schwalenju dnjoweho porjada wěnowaše so bilancy lěta 2016. Cyłkownje wudachu něhdźe 17 milionow eurow, suma dochodow wučinja něhdźe runja telko. Nadbytk něhdźe 380 000 eurow přeńdźe do rezerwy, kotraž tak na 915 000 eurow rozrosće.