Na chórowej serenadźe tež serbske štučki zaklinčeli

Dienstag, 12. Juni 2018
Artikel bewerten
(0 Stimmen)
Program 20. chóroweje serenady je minjeny pjatk w Rakecach chór Kulowskeho  Bratrowstwa sobu wuhotował.  Foto: SN/Maćij Bulank Program 20. chóroweje serenady je minjeny pjatk w Rakecach chór Kulowskeho Bratrowstwa sobu wuhotował. Foto: SN/Maćij Bulank

Rakecy (LR/SN). Mjeztym hižo 20. raz je so minjeny pjatk w Rakecach chórowa serenada wotměła. Wjesnjanosta Swen Nowotny (CDU) wšitkich přitomnych němsce a serbsce postrowi. Składnostnje jubileja dźakowaše so wón Rakečanskemu žónskemu chórej a chwaleše sej, kak jeje čłonki kulturne žiwjenje we wsy wobohaćeja. Ideju serenady zrodźili běchu něhdy na sportowym swjedźenju, hdźež chcyše chór sobu skutkować. Zazběh bě 23. junija 1999. Wot lońšeho wotměwa so chórowa serenada na dworje Pawołskeje šule. Tamne lěta wotměwaše so wona před hrodom.

Rakečanski žónski chór jako hosćićel serenady wobsteji wot lěta 1995. Cornelia Symankowa, pochadźaca z Holešowa, jón wot lěta 1996 nawjeduje. Na serenadźe je z wašnjom, zo sej wšelake chórowe ćělesa přeprošeja. Jako prěni překwapi tónraz Budyski měšany chór Harmonija. Wón zanošowaše lóštne a ludowe spěwy, mjez kotrymiž bě tohorunja serbski. ­Tež muski chór z Budestec bě z hosćom w Rakecach. Jeho čłonojo pospytachu so samo ze staršim šlagrom. Rakečanscy cyrkwinscy pozawnisća mjez wustupami jednotliwych cyłkow zahudźichu, mjez druhim tež serbske štučki kaž „Běži ­woda“, „Katyržinka“ a „Hanka, budź wjesoła“.

Chór Kulowskeho Bratrowstwa njespěwaše prěni raz w Rakecach. Ze žonami w serbskej narodnej drasće skićeše wón wosebje rjany wobraz. Za dostojny a kwalitatiwnje jara dobry wustup žnějachu spěwarki a spěwarjo mócny aplaws publikuma. Napadnyło je, zo ma chór Bratrowstwa tež młódšich čłonow, čemuž w tamnych cyłkach tak njeje.

Jako posledni wustupichu hosćićeljo sami. Woni zawjeselichu wopytowarjow z tójšto lubosćinskimi štučkami, ale tež lóštny spěw z Łaćonskeje Ameriki bě pódla. W dobrej kwaliće zaklinča serbski „Jank pod hajkom woraše“. Na kóncu wšitke chóry zhromadnje zaspěwachu.

Veröffentlicht in Kultura
Bitte anmelden, um einen Kommentar zu posten

Anzeige