Do sotrownjow załožić
Mały Wjelkow. Kónctydźenski program w Małowjelkowskich sotrownjach zahaji so kaž kóždu sobotu tež jutře w 17.30 hodź. z yogu. Wječorna chłóšćenka budźe koncert ze swětoznatym bubnarjom Günterom Babyjom Sommerom. K hudźbje nastanje wobraz, ke kotremuž inspiruja hudźbnika formy a barby. Njedźelu móžemy so wot 14 hodź. na jazzowu improwizaciju Scottyja Böttchera a Macka Goldsburyja wjeselić.
Namša w Serbskej cyrkwi
Zły Komorow. Wěriwi a dalši su njedźelu w 14 hodź. na serbsko-němsku namšu do Złokomorowskeje Serbskeje cyrkwje z fararjom Dieterom Schüttom přeprošeni. Po kemšach prosy wosada na kofejpiće a spěwanje.
Rjemjeslniske wiki w Błótach
Bórkowy. Jutře a njedźelu wotměja so w Bórkowach rjemjeslniske a burske wiki. Z dujerskej hudźbu je w 10 hodź. zahaja, wjesnjanostka Ira Frankmann wiki wotewrje. W programje wustupitej w 14.45 hodź. folklorna skupina Drjewjanki a w 16 hodź. Serbska drastowa skupina ze Strobic. Njedźelu w 14.10 hodź. zawjeseli wopytowarjow Bórkowska rejwanska skupina. Wot 10 hodź. móža sej woni wšelake rjemjesła wobhladać.
