Praha (dpa/SN). Dźeń do wopyta w Italskej a na kupje Malta je čěski ministerski prezident Andrej Babiš w prašenju ćěkancow swoju bjezkompromisnu poziciju potwjerdźił. „Hdyž wo tym rěču, zo nochcu ani jeničkeho migranta přiwzać, da tohodla, zo bych signal dał“, rjekny załožer populistiskeho hibanja ANO po zdźělenju powěsćernje čtk wčera w Praze. Babiš sej žadaše, zo měli zrěčenja ze sewjeroafriskimi statami wujednać, zo bychu ćěkancow wróćo brali.
W Romje wočakowaše Babiša dźensa italski ministerski prezident Giuseppe Conte. Wobaj politikarjej běštaj so minjene dny w prašenju migracije w Srjedźnym morju zjawnje rozestajałoj. Čěska bě italsku próstwu wotpokazała, přiwzać ćěkancow, kotřiž z čołmami přijědu. Italska žada sej wot čłonskich statow EU wjace solidarity. Čuje so hladajo na spochi přichadźacych ćěkancow wosamoćena a je swoju politiku migrantam a pomocnym organizacijam napřećo widźomnje přiwótřiła. Tež na kupje Malta su pječa hranicy poćežowanja docpěli. Tam čaka tohorunja tójšto ćěkancow na dalejězbu do druhich europskich krajow.