Berlin (SN/MiR). „Běše to dobra rozmołwa, tež hdyž dyrbjachmy dołho na nju čakać“, rjekny nawodnica Berlinskeho mjeńšinoweho sekretariata Judit Šołćina po prěnim zetkanju mjeńšinoweje rady ze społnomócnjenym zwjazkoweho knježerstwa za naležnosće wusydlencow a narodne mjeńšiny dr. Berndom Fabritiusom. Politikar je zajim za naležnosće mjeńšin pokazał, so jako jich „prawiznik a rěčnik“ wuznał a zdobom zwuraznił, zo ma Němska naležnosće mjeńšin dale chutnje brać. Minjeny pjatk běchu so zastupjerjo štyrjoch awtochtonych narodnych mjeńšin w Berlinje zetkali. Mjez wobdźělnikami běchu serbscy čłonojo mjeńšinoweje rady Bjarnat Cyž, Dawid Statnik a Kito Ela kaž tež sobudźěłaćerce mjeńšinoweho sekretariata Judit Šołćina a Madlenka Kowarjec. Na dźěłowym wuradźowanju w zwjazkowym ministerstwje za nutřkowne, twar a domiznu (BMI) běše jedne ćežišćo, kotrež wobdźělenych Serbow zaběraše, rjadowanje wo změnje swójskeho mjena. Rozmołwa wo zapřijeću „Domizna“ po kotrymž je wotrjad BMI pomjenowany, wuwabi dalšu diskusiju.