Nastorki z Njebjelčic za 15 łužiskich tezow Lěwicy k strukturnej změnje
Drježdźany (SN/at). W zwisku ze zakónčenjom wudobywanja brunicy njeměła so strukturna změna we Łužicy jeničce wobmjezować na perspektiwu stata a hospodarstwa. Tworićelske mocy regiona su runje tak prašane. Lěwica w Sakskej móže sej tajki zazběh předstajić, kajkiž bě před sto lětami z Bauhausom w architekturje, industriji a wšědny dźeń.
Jako přinošk k debaće staj zapósłancaj Lěwicy Sakskeho krajneho sejma Kathrin Kagelmann a Mirko Schultze zhromadnje z Antoniju Mertsching z Drježdźan 15 tezow za proces strukturneje změny we Łužicy předpołožiłoj. „Předstejace swětowe klimowe zetkanje w Katowicach, wuradźowanja wo dwójnym etaće Sakskeje 2019/2020 a wězo tež dźěławosć komisije za rozrost, strukturnu změnu a dźěło běchu rozsudne, zo smy mysle, kotrež hižo dlěje rozjimujemy, nětko wozjewili“, praji Nišćanska zapósłanča Kagelmann našemu wječornikej.
