Kamjenc (HJa/SN). K wólbam Budyskeho wokrjesneho sejmika, kotrež budu lětsa 26. meje, nastupi cyłkownje pjeć maćernorěčnych Serbow na lisćinje CDU. Wokrjesny zwjazk strony je jich z dalšimi požadarjemi wo městno we wokrjesnym sejmiku sobotu w Kamjenskim hotelu Město Drježdźany jako kandidatow wobkrućił.
Za načolneho kandidata na lisćinje wólbneho wokrjesa 12, sahaceho wot Halštrowa přez Kulow hač do gmejny Łaz, wuzwolichu Dawida Statnika, kotryž je zdobom předsyda Domowiny. Wón je so sobotu w Kamjencu sobustawam wokrjesneho zwjazka jako nowy čłon strony a kandidat za wokrjesny sejmik předstajił a swoju prezentaciju serbsce zahajił. 35lětny Ralbičan, kiž je hakle wotsrjedź decembra z čłonom CDU, zwurazni, zo chce so zaměrnišo za Serbow w Budyskim wokrjesu zasadźeć. Jako dalši serbski kandidat předstaji so sobotu w Kamjencu zdobom předsyda zarjadniskeho zwjazka Při Klóšterskej wodźe, kotremuž přisłuša pjeć serbskich gmejnow, Měrko Domaška. Serbskopazličan skedźbni serbsce a němsce na serbski pasus w stronskim programje.
