Berlin (dpa/SN). Zwjazkowa kanclerka Angela­ Merkel (CDU) móže njespokojnosć a roznjemdrjenosć mnohich ludźi na wuchodźe Němskeje rozumić. „Njedźiwam so tomu, zo je na wuchodźe tójšto frustracije“, rjekny kanclerka tydźenikej Die Zeit, kotryž je dźensa wušoł. Hladajo na nazymu planowane wólby třoch krajnych sejmow we wuchodnej Němskej – to wočakuja wuspěchi prawicarskopopulistiskeje AfD – rěči Merkel wo wulkim politiskim wužadanju. Wona pak so wuprajenju spjećuje, zo je Němska tak pačena kaž hišće nihdy. Skerje chcyła rjec, „zo njebě kraj nihdy tak wujednany, kaž poprawom myslene“.

Na wuchodźe Němskeje je hišće tójšto strukturnych problemow, zwjazkowa kanclerka měni. „Nadźija, zo so wurunanje spěšnje poradźi, je so w někotrych wobłukach rozbiła.“ Namrěwstwa a dawkowe dochody su snadniše, ludźo njemóža sej zamóženje natwarić. „Tohodla so ludźo prašeja: Kak dołho ma to hišće trać?“ Politikarjo maja tuž wusahowacy nadawk, runohódne žiwjenske wuměnjenja wutworić.