Drježdźany (dpa/SN). Sakski hospodarski minister Martin Dulig (SPD) sej žada, ze žonami w hospodarstwje fairnje wobchadźeć. „Bjez žonow by dźěłowy swět w Sakskej stejo wostał“, rjekny wón wčera w Berlinje hladajo na dźensniši Mjezynarodny dźeń žonow. Bjez žonow njeby Sakska jenož chětro zrudny blečk była, ale njeby tež hospodarsce wobstać móhła. „Busy a tramwajki bychu stejo wostali, lěkarske praksy a šule zawrjene“, hospodarski minister zwěsći.

Po słowach Martina Duliga je w Sakskej nadpřerěznje wjele žonow powołansce aktiwnych, w starobje 18 do 65 lět na wšě 78 procentow. Tež podźěl powołanskich kwalifikacijow a wysokošulskich wotzamknjenjow je wulki. „Cyła towaršnosć ma swoje lěpšiny wot najlěpje wukubłaneje žónskeje generacije wšěch časow. Njeje ani jeničkeje přičiny, čehodla měli žony mjenje zasłužić hač jich muscy kolegojo. Samsna mzda za samsne dźěło dyrbjała samozrozumliwa być.“