Zwjazkowy rěčnik Zwjazka 90/Zelenych Serbski institut wopytał
Budyšin (SN/at). Swójski danski pochad je tomu polěkował, zo je zwjazkowy rěčnik Zwjazka 90/Zelenych Robert Habeck wčera popołdnju Serbski institut wopytał a so tak prěni raz ze Serbami zetkał. Direktor dr. Hauke Bartels jemu wědomostne zarjadnišćo předstaji. Wón wobswětli stawiznisku stronku a skedźbni na to, zo bě institut jenički duchownowědny w NDR, kotryž wot znowazałoženja hač do dźensnišeho wobsteji. „Dokumentujemy a spěchujemy serbšćinu, zhotowjamy natočenja ze starymi maćernorěčnikami“, mjenowaše Bartels nadawki z wotrjada rěčespyt. Wotrjad kulturne wědomosće je koncepciju za strukturnu změnu zdźěłał a samo wědomostny diskurs wo wjelku, zaso připućowanej mjeńšinje, nastorčił.