Zarjadowanja dźěłarnistwow k 1. meji w Budyšinje a druhich městach
Budyšin (CS/SN/MkWj). Wjace hač tysac ludźi je so wčera składnostnje 1. meje na Budyskich Žitnych wikach zhromadźiło. Wokrjesny předsyda DGB a prěni społnomócnjeny dźěłarnistwa IG metal we wuchodnej Sakskej Jan Otto jich powita. Na zarjadowanju skedźbnichu sobudźěłaćerjo wuchodosakskich zawodow kaž mebloweje firmy Maja w Kulowje, Accumotive w Kamjencu abo Ontex w Budestecach na tuchwilne nutřkozawodne rozestajenje wo lěpše dźěłowe a žiwjenske wuměnjenja. Jürgen Kerner, jednaćelski čłon předsydstwa IG metal, w tym zwisku w swojej narěči na to pokaza, zo su dźěłarnistwa motor za dobre dźěło a socialny postup. Mjez druhim wón rjekny: „Dźěłarnistwa reprezentuja socialnu, ekologisku a demokratisku transformaciju dźěłoweho swěta a towaršnosće. Ta pak móže so jenož poradźić, hdyž nastanje wulki zhromadny projekt stata, dźěłodawarjow a dźěłarnistwow.“ Runje wuchodosakski region móhł so z modelowej kónčinu za mobilitu a składowanje energije stać. Wotpowědne wuměnjenja su date.
