Załožba planuje twarske dźěła w Serbskim ludowym ansamblu

Budyšin (SN/JaW). Nowa rada Załožby za serbski lud je skonstituowana. W Budyskim Serbskim domje su wčera jeje čłonojo pod nawodom předsydy přirady załožby a zapósłanca Sakskeho krajneho sejma Marka Šimana (CDU) jednohłósnje Susann Šenkec za předsydku załožboweje rady wuzwolili. Nowy městopředsyda je Choćebuski wyši měšćanosta Holger Kelch (CDU). Prawje bórze chcedźa dalšeho městopředsydu abo městopředsydku wolić. To bě wólbny nawoda Marko Šiman namjetował. „Derje by było, bychmy-li dweju zastupjerjow předsydki załožboweje rady měli: jednoho z Delnjeje a dalšeho z Hornjeje Łužicy. Tak bychmy runohódne zastupnistwo měli, štož mam za spomóžne. Zrjadować dyrbimy za to prawniske ramiki“, rjekny Šiman na naprašowanje. Přihłosować maja tomu hišće Zwjazk, Sakska a Braniborska. Politikar pak so nadźija, zo móhli hižo na přichodnym posedźenju gremija wo personaliji rozsudźić.