Sakska namjetej ministra Spahna přihłosuje – Braniborska čaka na zakoń

Drježdźany/Podstupim (dpa/SN). Zakonski naćisk zwjazkoweho ministra za strowotnistwo Jensa Spahna (CDU) nastupajo winowatostne šćěpjenje přećiwo wosypicam pola pěstowarskich a šulskich dźěći kaž tež pola lěkarskeho a šulskeho personala žněje w Sakskej přihłosowanje. Strowotniska ministerka Barbara Klepsch (CDU), krajna lěkarska komora kaž tež frakcija Lěwicy w sakskim sejmje namjet z Berlina witaja. Jens Spahn chcył šćěpjenje z pjenježnym chłostanjom hač do 2 500 eurow a z wuzamknjenjom z pěstowarnje přesadźić.

„Trjebamy winowatosć šćěpjenja přećiwo wosypicam, a to nětko“, praji Barbara Klepsch. Z dobrym přirěčowanjom a informaciskimi kampanjemi njeje trěbne šćěpjenje 95 procentow wobydlerstwa zwoprawdźomne. Winowatosć šćěpjenja w pěstowarnjach, šulach kaž tež pola medicinskeho a pedagogiskeho personala je runje prawy puć, dokelž je tam strach natyknjenja najwjetši, ministerka měni.