Choćebuz (HA/SN). Kaž Serbske Nowiny wčera rozprawjachu, je Domowinska župa Delnja Łužica šěsć kandidatow za nowu Radu za naležnosće Serbow w Braniborskej namjetowała. Su to Uta Henšelowa, nawodnica Šule za delnjoserbsku rěč a kulturu w Choćebuzu, Wylem Janhoefer, župan župy Delnja Łužica, Birgit Kaufhold z Grodka, kotraž je zdobom kandidatka Lěwicy za nowy braniborski sejm, Delia Münchowa, mějićelka krawcownje w Žylowje, Katrin Šwjelina, přistajena Domowiny, a Dieter Freihoff, dotalny čestnohamtski społnomócnjeny za serbske naležnosće we wokrjesu Dubja-Błóta. Namjetowani chcedźa so nětko zjawnje předstajić, mjez druhim je w septembrje wólbny forum w Choćebuzu planowany. Hižo 3. septembra budźe w Gołbinje (Gulben), gmejna Gołkojce, serbski wječork na temu „Rěč a politika“.
Kaž wólbny wuběrk zdźěli, je so dotal 360 zajimcow do wolerskeje lisćiny zapisać dało, štož je tež hišće hač do 21. septembra móžno. Tydźeń pozdźišo potom maja wšitke podłožki listowych wólbow wuběrkej předležeć.
