Berlin (dpa/SN). Zwjazkowy minister za financy Olaf Scholz je kónc tydźenja potwjerdźił, zo chce so wo nawodnistwo SPD prócować. W tym zwisku rěčeše wón prěni króć zjawnje wo swojich motiwach. Jako wicekancler chcył kandidaturu nastupajo swoju nahladnosć mjez ludźimi zasadźeć. „Sym sej wěsty, zo trjeba Němska sylnu socialdemokratisku stronu“, rjekny Olaf Scholz w Berlinje na dnju wotewrjenych duri na zwjazkowej nowinarskej konferency.
Nimo Scholza staj so sobotu a njedźelu dalšej porikaj požadarjow wo nawodnistwo naraženeje SPD předstajiłoj: delnjosakski nutřkowny minister Boris Pistorius a sakska ministerka za integraciju Petra Köpping kaž tež Flensburgska wyša měšćanostka Simone Lange a Alexander Ahrens, wyši měšćanosta Budyšina. Scholz so tohorunja za dwójne nawodnistwo wupraja. Dotal pak njemóže žane mjeno za kandidatku mjenować, kotraž by so z nim do boja wo předsydstwo podała.