Štyri dźěłarnički maja perspektiwu za region a Serbow pokazać

Budyšin (SN/MiR). „Inowacija z pomocu tradicije“ rěka manufaktura přichoda Fraunhoferskeho instituta. Wčera popołdnju je sakski ministerski prezident Michael Kretschmer (CDU) zhromadnje z jednaćelskim nawodu Instituta za dźěłowe hospodarstwo a organizaciju IAO w Stuttgarće prof. dr.-ing. Wilhelmom Bauerom a z předsydu Domowiny Da­widom Statnikom projekt w Budyšinje předstajił. Za krytej kofejowej taflu před Serbskim domom njedósta jenož městnosć wosebity raz. Skerje bě to hižo pokazka na to, zo su trěbne nowe ideje za wuwiwanje Łužicy, kotraž dyrbi w strukturnej změnje swoje městno namakać. Tomu dopomhać ma Fraunhoferski inowaciski labor „Manufaktura přichoda Łužicy“. Sakska přewostaja za projekt poł miliona eurow. Nastać maja štyri dźěłarnički w Choćebuzu, Běłej Wodźe, Woje­recach a Budyšinje, při čimž ma so Bu­dyska z trajnej stać. „Zběrać maja so ideje za předewzaća wšelakoreho razu a tak za wutworjenje dźěłowych městnow“, rozłoži prof. Wilhelm Bauer.