Remis w poslednjej mjeńšinje

Mittwoch, 02. Oktober 2019
Artikel bewerten
(0 Stimmen)

SJ Njebjelčicy

– ST Hlinowc 1:1 (0:1)

Zestawa domjacych: Hahn – Kral, Hanuza, Gödig, Pawlik, Čornak (53. Hrjehor, 69. Wagner), Domš (62. Lejnart), Plaettner, Hölzel, Haška, Korjeńk

Do stadiona při Jaworskej rěčce dojědźechu sej minjeny kónc tydźenja ko­parjo ST Hlinowca na derby susodow. Woni stejachu do partije na čole tabulki, Njebjelčenjo na 10. městnje. Z plakatami wokoło hrajneho areala běchu susodźa w nocy na njedźelu hižo horcy bój při­powědźili.

Njebjelčenjo startowachu ze zakopom do hry a měrjachu so direktnje na wrota přećiwnika, ale składnosće wrota docpěć njemóžachu wužić. Hosćom so poradźi situaciju na swoje dobro zwjertnyć, zaměstniwši bul něšto razow z wótrej flanku hłuboko w połojcy domjacych. Na zbožo je Chrystof Pawlik někotre třělwy w centrumje wotpopadnył. Tak zasadźichu tež Hlinowčenjo swoju šaltowu centralu wokoło kapitana Daniela Retzera. Centralny hrajer Lukas Lindemann posłuži Benjamina Bannerta na prawym křidle. Tón bul do běha přiwza a z kromy šěsnatki na łatu smokny. Na tamnej stronje bu Handrij Korjeńk wot Hlinowčana zadźeržany, za čož dósta wot derje hwizdaceho sudnika Markusa Mayera čerwjenu kartu. Přiwšěm poradźi so hosćom krótko na to nawjedowanje. Z centruma do haski sunjeny bul smokny Sven Käppler k 0:1 do saka.

W 53. min. zasadźeny Pawl Hrjehor dyrbješe po pjatnaće mjeńšinach zranjenja dla hrajnišćo zaso wopušćić. Robert Lejnart so z praweje strony něšto razow před šěsnatku přesadźi. Tež rodźeneho Worklečana móžeše defensiwny hrajer jenož hišće za trikotom zadźeržeć. Krótko wuwjedźeny wólny kop pak njezamó Jurij Haška na wrota přinjesć. Njebjelčenjo so přeco zaso strašnje před přećiw­niskimi wrotami jewjachu, ale bjez wuspěcha. W druhej mjeńšinje přidatneho hrajneho časa přesadźi so šef Njebjelčanskeje defensiwy Rony Hanuza do zasta­janeje šěsnatki. W prawym wokomiku posłuži wón Korjeńka. Z pjeć metrow bě wrotar Marcus Schmidt bjez šansy.

Dobra moralka mustwa a naposledk dobyty dypk postaraštej so po hrě wo dobru­ naladu přiwisnikow a hrajerjow Njebjelčanskeje SJ. Hlinowčenjo dyrbjachu so tuž tohorunja jeno z dypkom spokojić. Jurij Haška

Veröffentlicht in Sport
Bitte anmelden, um einen Kommentar zu posten

Anzeige