Napjata hra z dwojimi samowrotami

Montag, 18. November 2019
Artikel bewerten
(0 Stimmen)

ST Marijina hwězda

– ST Hnašecy-Dobruša 2:3 (1:2)

Zestawa domjacych: Matik – R. Cyž, Zelnak (44. Langer), Bělk, Hawš, Peschmann, Ch. Cyž, Pjetaš, Šołta, Eldor (86. Čornak), Pakoßnick

Na 11. hrajnym dnju wokrjesneje wyšeje ligi nastupi prěnje koparske mustwo ST Marijineje hwězdy na domjacym twjerdym hrajnišću přećiwo ST Hnašecam-Dobruši. Zaso pobrachowaše jemu wšelakorych přičin dla tójšto hrajerjow. Přez cyłe 90 mjeńšin běše partija bojowniska a napjata. Prěnju wulku móžnosć mějachu hosćo po dźesać mjeńšinach z třělwu na łatu ze zdalenosće 22 metrow. Woni wosebje w srjedźnym polu agresiwnje atakowachu, a tak njemóžachu Pančičenjo prawje kombinować. Hustodosć zhubichu w natwarje bul, a přećiwnik mócnje konterowaše. W 17. min. zadźěwa wrotar Dawid Matik tajkemu konterej a wrotam z wuběrnej paradu. Kuriozne běchu prěnje wrota hry. Po róžku za Hnašecy chcyše Jakub Zelnak situaciju wujasnić a kulowatu kožu ze strašneje cony kopnyć. To pak so jemu njeporadźi, a bul dźěše do hornjeho třiróžka swójskich wrotow (20.). Minutu po tym njeměješe Feliks Pjetaš z wólnym kopom zbožo, dokelž hrajny nastroj jenož łatu šmórny. Po spěšnym nadběhu přez prawy bok w 23. min. domjacy wurunachu. Falko Peschmann sflankowa bul dokładnje dosrjedźa k Jakubej Pakoßnickej, a tón ze šěsć metrow přetwori. Z tragiskim rjekom sta so w 26. min. znowa Zelnak­. Po róžku bu wón w swójskej šěsnatce­ njezbožownje natřěleny, a wot jeho hwizdźele skoči hrajny nastroj k 1:2 njedźeržomnje do wrotow. Z jasnej hrajnej přewahu pak zakomdźi přećiwnik mjezywuslědk zwyšić. Tak trjechi po spěšnych konterach dwójce žerdź a jónu wrota snadnje misny (28./29./30.).

Za druhi połčas žadaše sej Pančičansko-Kukowski trenar Erwin Kleinmann wot swojich chowancow hišće wjace bojownosće. Wyskać móžachu domjacy přiwisnicy zaso w 57. min. Po dołhim zamjeće Dawida Šołty a podlěšenju Christopha Cyža z hłowu wudoby sej Pakoßnick bul a stłóči jón z krótkeje distancy přez wrotowu liniju. Nětko hrajachu hosćićeljo na dobyće, a hosćo wědźachu sej jenož hišće z foulemi pomhać. W 62. min. bu Šołta namócnje atakowany, sudnik Steffen Thomas z Lohmena ze swojim kolektiwom pak to prawje njespózna a pokaza jeno žołtu kartu. Po hrubym zmylku w natwarje domjacych wuwojowachu sej Hnašečenjo w 71. min. bul a přelesćichu z jednorym pasom hosćićelski škit. Thomas Kebschull předrě so do šěsnatki, a zwyši na 2:3. W 84. min. wuchowa łata domjacych, a w 87. min. Matik z wulkotnej paradu wyšemu zastatkej zadźěwa. Tež Pančičenjo mějachu krótko do kónca dwě móžnosći, znajmjeńša hišće wurunać. Po róžku zhłójčkowa Feliks Langer bul na wrota (90.), tři mjeńšiny pozdźišo lećeše wótra třělwa Richarda Hawša na ruku škitarja, a to wočiwidnje w šěsnatce. Sudnik pak rozsudźi na wólny kop ze 16 metrow. Wot murje wotfalšowany bul Pjetaša dźěše wo pjeć centimetrow wyše wrotow, a tak wosta při snadnej poražce za koparjow ST Marijineje hwězdy. Tobias Nowak

Veröffentlicht in Sport
Bitte anmelden, um einen Kommentar zu posten

Anzeige