Drohotka Ramnow
– ST Marijina hwězda 5:0 (1:0)
Zestawa hosći: Matik – R. Cyž, Hawš, K. Pakoßnick (65. Čornak), Lipič, Peschmann (75. Langer), Ch. Cyž, Jurš, Wróbl, Šołta (65. Melnyk), Pjetaš
W třećim kole wokrjesneho pokala dyrbjachu koparjo ST Marijineje hwězdy pola tučasneho druheho wokrjesneje wyšeje ligi w Ramnowje nastupić, hdźež pak wysoko podležachu. Zaso wjacori w jich rjadach pobrachowachu, a tak dyrbješe trenar Bodo Pjetaš, zastupowacy Erwina Kleinmanna, nimale cyłe mustwo přestajić. Spočatna faza bě wurunana. Domjacy wšak dominowachu a wužichu hnydom prěnju składnosć pokalneho duela. Překrótko wotwobarany bul po róžku třěli Marco Schlegel, na kromje šěsnatki stejacy, z wulkotnej wolej-třělwu njedźeržomnje do klětki (26.). Dalšu šansu měješe domjacy nadběhowar, jako po rjanej přihrawce nadobo sam na wrota běžeše a bul wyše Dawida Matika zběhny, wrota pak wo centimetry misny (30.). W 40. min. mějachu klóšterscy koparjo zbožo, jako třělwa z 20 metrow jenož na łatu prasny. Woni njemějachu w prěnim połčasu ani jednu móžnosć.