Rózbork (UM/SN). Na wyšej policajskej šuli w Rózborku su minjeny pjatk Sakski institut za policajske a wěstotne slědźenje załožili. „Zwoprawdźimy dalše poručenje komisije Staigis“, rjekny sakski nutřkowny minister Roland Wöller (CDU). Pod nawodom bywšeho admirala Armina Staigisa dźěłacu komisiju běchu nalěto zasadźili, zo bychu organizaciju a strukturu policajskeho wukubłanja w swobodnym staće přepytowali a wotpowědne pokiwy zdźěłali. Jedne z doporučenjow bě, nimo ryzy wukubłanja tež slědźenje do strukturow policajskeje wyšeje šule zarjadować. „Je tójšto temow, kotrež mamy přeslědźić“, praji prof. Marcel­ Schöne, jedyn z dweju direktorow nowozałoženeho instituta. Jedna z temow je prašenje, hač ma sakska policija problem z prawicarskim ekstremizmom. „Tajke prašenje njeměło so jako nadpad zrozumić, ale jako nastork, so wědomostnje z nim rozestajeć a wotpowědne wotmołwy zdźěłać.“ Minjeny čas drje běchu w Rózborku prašenje hižo rozjimali, wobhladowachu pak to jako „priwatnu naležnosć docentow a studowacych“.