Wšudźe, hdźež sy, diskutuja wo zmysle a njezmysle wšelakich postajenjow wokoło škita před konorawirusom. Wosebje nětko, hdyž wšelake wobłuki chětro rozdźělnje wolóžeja, dwěle w ludnosći přiběraja. Kak wjeseli běchu přiwisnicy kopańcy, jako před tydźenjemi dowolichu, zo smědźa profijojo zaso za bulom honić. Němska je w tym nastupanju prěnje kroki činiła. W druhich krajach chwilku wočaknychu, w mnohich najwyšich ligach kulowata koža samo hišće wotpočuje. Němske knježerstwo bě tudyšu koparsku ligu na dźiwne wašnje samu rozsudźić dało.
A kak wjesoły běch ja, jako z naprašowanja mojeho rozhłosoweho kolegi Měrćina Wjenka na serbskich wjeskach zhonich, zo mamy runje tam rozumnych ludźi, kotřiž so prašeja, hač dyrbi to woprawdźe być, ... a měnja, zo su wažniše wěcy hač kopańca. To runje tak widźu.