Krótkostudija wo ludowym wuměłstwje w NDR wušła
Choćebuz (SN/CoR). Němskorěčnu krótkostudiju „Ludowe wuměłstwo jako serbska moderna?!“ staj minjeny pjatk Daniel Häfner z towaršnosće „Häfner und Laschewski Lausitzer Institut für strategische Beratung“ a wuměłča Maxie Heiner něhdźe 15 zajimcam digitalnje předstajiłoj. 32stronsku bohaće ilustrowanu brošurku běštaj wonaj w dźělnym projekće „Wuwiwanje strategijow walorizacije“ we wobłuku wědomostneho předewzaća „Hódnoćenje imaterielneho kulturneho namrěwstwa Delnjeje Łužicy w němsko-serbskim konteksće“ zdźěłałoj. Studija zaběra so z dokumentaciju, archiwowanjom a posrědkowanjom serbskeho ludoweho wuměłstwa w NDR.
