Skedźbliwje planuje Serbski institut (SI) sep nalětnich zarjadowanjow, kotrež móhli zajimcy wosobinsce wopytać. Nimo­ toho skedźbnja na nowostce na di­gitalnym polu.

Budyšin (SN/bn). Delnjoserbska prawopisna kontrola za kompjuterowe tekstowe programy bu rozšěrjena a wopřijima nětko dohromady něhdźe 90 000 zapiskow (SN rozprawjachu). Dalši projekt, kotryž Serbski institut přewodźa, je zhotowjenje digitalizatow za Saksku krajnu a uniwersitnu biblioteku Drježdźany. Kaž ze zdźělenki SI wuchadźa, wudospołnja wotnětka 19 lětnych zwjazkow z dohromady 10 600 rukopisnymi stronami z pjera sobustawow studentskeho towarstwa „Serbowka“ w Praze, nastatych wot lěta 1892 do 1925, wirtuelny archiw www.sachsen.digital.de. Nimo toho su tam 40 dalšich historiskich ćišćow serbskeho pismowstwa spřistupnili.