Spisowaćel Sten Nadolny w Haninej cyrkwi 8. Kamjensku narěč dźeržał

Kamjenc (SN/at). K mjeztym kedźbyhódnej tradiciji, we wobłuku rjadu „Kamjenskeje narěče w Haninej cyrkwi“ so z přitomnosću z perspektiwy myslenja Gottholda Ephraima Lessinga rozestajeć, je Berlinski spisowaćel Sten Nadolny wčera dalši kapitl přinošował. „Stysk za zbožom, zo so něšto radźi“ rěkaše titul jeho nastorkow k rozmyslowanju. Rěčnik njeje so jeno z wopřijećemi stysk, zbožo abo poradźenje rozestajał, ale je je do dźensnišeho konteksta zarjadował a tak zwobraznił, zo ludźom žiwjenje ćežke činja, njejsu-li spjelnjene. „Zwotkel tale nje­spokojnosć pochadźa“, so wón prašeše, twjerdźo, zo je to zdobom „začuće womory na wšěch runinach, wšojedne kak derje so nam při tym materielnje dźe“.