New York (dpa/SN). Z prěnjej narěču Joewa Bidena jako prezidenta USA zahaji so dźensa wječor kóždolětna generalna debata UNO w New Yorku. Rěčeć chcedźa nimo Bidena tež zastupnicy Irana, Turkowskeje, Francoskeje a Šwicarskeje. Po tym zo běchu lońšu generalnu debatu koronapandemije dla digitalnje přewjedli, je lětsa wjele statnych a knježerstwowych šefow wosobinsce do New Yorka přijěło. Němsku zastupuje zwjazkowy prezident Frank-Walter Steinmeier.
Spytaja Francosku změrować
Washington (dpa/SN). Knježerstwo USA so w diplomatiskej zwadźe z Francoskej prócuje swojeho partnera w Parisu zaso změrować. Prezident USA Joe Biden je wo telefonat z francoskim statnym prezidentom Emmanuelom Macronom prosył, kaž wysokorjadny zastojnik we Washingtonje zdźěli. Francoska reagowaše přewšo hněwna, po tym zo běchu USA, Wulka Britaniska a Awstralska nowy zwjazk wutworili, na čož je Awstralska zrěčenje z Francoskej wo dodawanju podnurjakow wupowědźiła.
Wotstup Putina sej žadali
