Budyšin (dpa/SN). Swoje wólbne plakaty „Hängt die Grünen“ dyrbi prawicarska strona Třeći puć wotstronić. To je Sakske wyše zarjadniske sudnistwo w Budyšinje (OVG) wčera w chwatnym jednanju rozsudźiło a tak wukaz města Zwickauwa přećiwo plakatam wobkrućiło.

Plakaty wohroža zjawnu wěstotu, kaž OVG wopodstatni. Strony drje smědźa kritiku tež w polemiskej formje zwuraznić, dokelž škita Zakładny zakoń swobodu měnjenja. Hranica pak je překročena, jedna-li so wo móžny chłostajomny delikt. Motiw plakata wotpowěduje „objektiwnym faktam našćuwanja ludu“ a so za to hodźi, zjawny měr přez hidypołne ­našćuwanje kaž tež přez nadpad na čłowjesku dostojnosć sobustawow Zelenych mylić, kaž ze stron sudnistwa rěka.