Choćebuz (dpa/SN). W delnjołužiskim Choćebuzu nastawa nowy centrum, kotryž ma wo naprawach strukturneje změny we Łužicy informować. K njemu słuša tež nowa hladarnja ćahow Němskeje železnicy, kotraž dyrbi tam wot lěta 2024 dźěłać. Jako zakład přewjedźechu minjeny pjatk symboliski prěni zaryw za twar informowanišća direktnje při hłownym dwórnišću, kaž powěsćernja dpa zdźěli. Klětu kónc februara chcedźa je wotewrěć.
150 kwadratnych metrow wulke twarjenje ma aktualny staw planowanjow noweje železniskeje twornje nazornje pokazować kaž tež wo postupje twarskich dźěłow informować. W pawiljonje předstajeja nimo toho dalše projekty, kotrež financuja z inwesticiskeho zakonja Zwjazka za wuhlowe kónčiny a z kotrymiž chcedźa zamołwići politiki změnu strukturow w Braniborskej spěchować. Přidatnje skići pawiljon městno za wšelakore zarjadowanja. Pjenjezy za twar informaciskeho centruma w Choćebuzu pochadźeja z fondsa wo skrućenju strukturow Zwjazka.