Drježdźany (SN/bn). Institut za krajinowu architekturu Techniskeje uniwersity Drježdźany wuhotuje w aktualnym semestrje wječorny rjad „Schlaglichter“, z kotrymž chce studentam a dalšim zajimcam interdisciplinarne dohlady do slědźenja a wučby swojeho wědomostneho směra podawać. Hosćićel wčera­wšeho zarjadowanja prof. dr. Marcus Köhler­ powita přitomnych a předstaji jim referentku dr. Lubinu Malinkowu, sej wot njeje zawodny postrow w serbšćinje přejo. Sobudźěłaćerka Serbskeho instituta dr. Malinkowa próstwje „rady wotpowědujo“ rjekny: „Witajće do Drježdźan! Serbski postrow tu je rjane znamjo za to, kak Mały Wjelkow nas hromadźe wjedźe“, z čimž zdobom temu swojeho přednoška narězny.