Amplowe knježerstwo SPD, Zelenych a FDP serbske projekty we wobłuku strukturneje změny, kotrež maja so lětsa zahajić, dlijaceho so nastaća etata Zwjazka dla do wuskosćow přinjese.
Podstupim (SN/at). Start serbskich projektow we wobłuku změny strukturow w Braniborskej je akutnje wohroženy. Na to skedźbni referent za naležnosće Serbow w braniborskim ministerstwje za wědomosć, slědźenje a kulturu Měto Nowak wčera na digitalnje přewjedźenym posedźenju tamnišeje Rady za naležnosće Serbow. Kaž wón rjekny, je zwjazkowe ministerstwo nutřkowneho wo postupowanju nastupajo zdźěłanje lětušeho zwjazkoweho etata informowało. W měrcu chce knježerstwo naćisk parlamentej přepodać, a jako posledni krok budźe so Zwjazkowa rada z nim w lěću zaběrać. „To rěka, zo nachwilne hospodarjenje hač do lěća traje. Projekty strukturneje změny móža so najzašo w awgusće zahajić“, Nowak rozłoži. Hdyž pjenjezy potom skónčnje budu, dyrbja přizwolene srědki hač do kónca lěta přetrjebane być, hewak zbywace sumy spadnu.