Serbski ludowy ansambl 70 lět wobstaća z 2 000 hosćimi woswjećił
Budyšin (SN/CoR). Z Dnjom wotewrjenych duri je so wčera swjedźenski kónc tydźenja Serbskeho ludoweho ansambla składnostnje 70lětneho wobstaća zakónčił. Něhdźe 1 500 ludźi wužiwachu składnosć, sej tež wobnowjeny dom wobhladać. Hižo pjatk běštaj intendant Tomas Kreibich-Nawka a jednaćelka SLA Diana Wagnerec na internym zarjadowanju jako hosći statnu ministerku za kulturu Barbaru Klepsch (CDU) a dalšich zastupjerjow ze zwjazkoweje, krajneje a lokalneje politiki kaž tež přećelow z institucijow, towarstwow a předewzaćow witałoj. „Gratuluju Serbskemu ludowemu ansamblej wutrobnje a dźakuju so wšitkim, kotřiž su k tomu přinošowali, zo ma SLA hižo tak dołho wulki wuznam jako kruta a spušćomna institucija we łužiskej a sakskej kulturnej krajinje“, rjekny Barbara Klepsch. Jan Budar njegratulowaše jenož jako direktor Załožby za serbski lud a towaršnik ansambla, ale tež w mjenje Załožboweje rady a jeje předsydki Susann Šenkec kaž tež Parlamentariskeje přirady a jeje předsydy Marka Šimana (CDU).