Serbski sejm so dźensa ze žadanjemi na knježerstwa wobroćił
Drježdźany (SN/mb). Zapósłancaj Serbskeho sejma, Jadwiga Pjacec a Hajko Kozel, předsyda wuběrka „wustawa a prawo“, staj dźensa w Sakskim krajnym sejmje žadanja 2018 woleneho gremija knježacym na krajnej a zwjazkowej runinje sposrědkowałoj. Po serbskim witanju Pjacec je dr. Měrćin Wałda, fachowc-čłon wuběrka „wustawa a prawo“, nawjazujo na stawizny wuchodosłowjanskich kmjenow, kotrež běchu na teritoriju něhdyšeje NDR sydlili, spad serbowanja rozkładował. Porno jeho dźěćatstwu, hdyž móžeše po puću do Delnjeje Łužicy wšudźe serbowacych ludźi dožiwjeć, je naša rěč wšědny dźeń mjeztym mjenje abo bóle na „katolski třiróžk“ wobmjezowana. Kampanja „Sorbisch? Na klar.“ wopačny zaćišć samozrozumliwosće zbudźa, twjerdźi Wałda.