Budyšin (SN/mb). Smolerjec kniharnja běše wčera wječor kopaće połna, jako by wjednica Annett Šołćić na prezentaciju serbskeho bestsellera přeprosyła. Ale wona měješe eksaktnje jedyn eksemplar k dispoziciji, a zo sej nimo uniwersitow wjele ludźi jendźelskorěčnu knihu nižozemskeho nakładnistwa pod titulom „Upper Sorbian Language Policy in Education“ (hornjoserbska rěčna politika w kubłanju) za 125 eurow skaza, ani pólska awtorka Nicole Dołowy-Rybińska njewěri. Wona je zhromadnje ze swojej sobuslědźerku Cordulu Ratajczakowej wuslědki zhromadneje studije na serbskim gymnaziju w Budyšinje (SGB) prezentowała. Přiwšěm „njeběše wotpohlad, konkretnu šulu kritizować“ (Ratajczakowa), ale w rozmołwje ze šulerjemi wšelakeho pochada wotkrywać, kak „rěčne ideologije“ (Dołowy-Rybińska) tomu zadźěwaja, zo so oficielna zasada kubłanskopolitiskeho modela 2plus spjelnja: „Wšitcy šulerjo maja w šuli aktiwnu serbsko-němsku dwurěčnosć docpěć, njewotwisnje wot dotalneho rěčneho wuchadneho niwowa.