27. Budyske dźiwadłowe lěćo z wjace hač połsta zarjadowanjemi

Budyšin (SN/bn). Němsko-Serbske ludowe dźiwadło hotuje so na 27. dźiwadłowe lěćo. We wobłuku nowinarskeje rozmołwy wčera přestaji wyši hrajny nawoda NSLDź Stefan Wolfram inscenaciju „The Addams Family“, kotruž chcedźa wot 22. junija hač do 30. julija cyłkownje 33 króć na dworje Budyskeho hrodu pod hołym njebjom předstajić. Wolfram, zdobom režiser produkcije, připowědźi „musical a komediju wo swójbje a lubosći“ z dohromady 28 spěwami, skomponowanymi wot Andrewa Lippy; cyły hrajerski ansambl domu je zapřijaty. W přełožku Anje Hauptmann pokazaja hru Marshalla Brickmana a Ricka Eliceho po motiwach Charlesa Addamsa we wersiji, kajkuž „w lěće 2010 premjernje na New-Yorkskim Broadwayju předstajichu a kotruž mjeztym po cyłym swěće wuspěšnje inscenuja“.

Nawodnica wopytowarskeho serwisa Kristin Pätzoldowa wuzběhny, zo je „předpředań zastupnych lisćikow derje zaběžała. Dotal smy něhdźe 18 500 kartkow předali. Hač do 21. junija je hišće móžno, sej tiket dočasnje knihować, kiž je porno předani při wječornej kasy trochu tuńši.“