Budyšin (SN/mb). Wito Bejmak, lońši lawreat Myta Zejlerja, skutkuje rady jako pućrubar za łoskoćiwe, ale bytostne prašenja. Tak so na poslednim posedźenju zwjazkoweho předsydstwa (ZP) Domowiny jako čłon gremija prašeše: Je kóždemu Serbej móžno, so na mjezynarodnym folklornym festiwalu „Łužica“ wobdźělić? Hladajo na zastupny lisćik za 25 eurow za dorosćeneho, štož móže za cyłu swójbu někak sto eurow rěkać, běše płaćizna tež pola druhich ludźi tema. Wšako pjenjezy za kulinariske chłóšćenki k tomu přińdu, tunja syćata jědź z jednoho hornca do poskitka njesłušeše. Druzy praja: Zastup za tři hodźiny Krabatowych swjedźenskich hrow płaći 45 eurow, potajkim njetrjebamy wo 25 za kónc tydźenja diskutować. Katharina Jurkowa z přihotowanskeho teama festiwala, praji jasnje: „Mjenje njeńdźe.“ Hakle štyri njedźele do toho su płaćizny postajić móhli. Prjedy, kaž n. př. 2019 (20 eurow), běše to poł lěta do toho. Wona je wjele domoródnym małym firmam dźakowna, kotrež su so za sponsoring rozsudźili, jich bě wjac hač w zašłosći. Organizatorojo su krótkodobnje hišće 50 listow z próstwu wo podpěru rozesłali.