Tradicionalna přehladka do hód

Budyšin. Pod hesłom „Wuměłstwo zběrać a darić“ zahaja dźensa, pjatk, tradicionalnu hodownu wustajeńcu Budyskeho wuměłstwoweho towarstwa w galeriji Budissin. Přehladka pokazuje wubrane twórby 30 łužiskich wuměłcow, kaž na přikład Iris Brankačkoweje, Eberharda Petersa, Isy Bryccyneje a Andreasa Henniga. Na wernisaži, kotraž započnje so w 19 hodź., porěčitej Tanja a Jana Böhme, wo hudźbne wobrubjenje postara so Michael Linke na gitarje.

Ze swingom do adwenta

Budyšin. Tohorunja tradicionalnje prezentuja Budyske serwisowe kluby Lions, Rotary, Soroptimist, Leo a Lions Lusatia jutře, sobotu, kaž tež zajutřišim beneficne koncerty rjadu „Swingin‘ Santa“. Pod profesionalnym nawodom nazwučowany program bigband z 20 hudźbnikami w starobje 12 do 18 lět kaž tež ekstra zestajaneho chóra wopřijima mjezynarodne, němske, pólske a serbske hodowne spěwy, kotrež zaklinča w šaće swinga. Sobotu prezentuja je w 16 kaž tež 20 hodź. a njedźelu w 16 hodź., stajnje w Kamjentnym domje. Zastup je darmotny, zarjadowarjo pak wjesela so nad šćedriwymi darami.