Emocionalna debata wo Łužiskim festiwalu w Braniborskim sejmje

Podstupim (SN/bn). „Wuhódnoćenje Łužiskeho festiwala“ bě hesło „fachoweje rozmołwy“, kotraž bě jedne z ćežišćow wčerawšeho zjawneho posedźenja wuběrka Braniborskeho krajneho sejma za wědomosć, slědźenje a kulturu. Z wida Marije Schulz, jednaćelki festiwal zarjadowaceje, lětsa wutworjeneje towaršnosće z wobmjezowacym rukowanjom, je so „zešlachćiło etablěrować struktury, kotrež zmóžnjeja spjelnić nadawk, kajkiž je Zwjazk jako hłowny pjenjezydawar sformulował, mjenujcy Łužicy nadregionalnje a mjezynarodnje widźomnosć spožčeć“. Za wuměłstwowe wusměrjenje zamołwity intendant festiwala prof. Daniel Kühnel wuzběhny, zo je „Łužica mjeztym mjezynarodnym wuměłcam na swětowym niwowje a jich agenturam kónčina, w kotrejž chcedźa na kóždy pad wustupować“.