Južny Tirol wotnětka z nowym srjedźo-prawicarskim knježerstwom

Bozen (HS/SN). Su to runje wosebite dny w Južnym Tirolu. Na jednym boku, dokelž hołduje we wjetšinje němskorěčna prowinca na sewjeru Italskeje nowemu rjekej: Tennisowy profi Jannik Sinner z hórskeje wsy Sexten, kiž bě kónc tydźenja turněr Australien open dobył a kiž steji ze swojimi 22 lětami na spočatku swětoweje karjery. A potom maja tam hišće politisku změnu časow. Wot wčerawšeho podawa so křesćansko-demokratiska Južnotirolska ludowa strona (SVP) po lětdźesatkach wulkeje dominancy do knježerstwoweho zwjazka z hnydom třomi stronami z lěhwa prawicarjow. Tajku wulku koaliciju w Južnym Tirolu hišće nihdy njemějachu. Hižo so prašeja, hač je tole snadź politiske předznamjo druhim kónčinam w Europje?