Prapremjera na hłownym jewišću na zakładźe stawiznow Hercow

Budyšin (SN/bn). Prapremjera inscenacije Němsko-Serbskeho ludoweho dźiwadła „Na tamnym boku měsačka – Hercy“ je předwčerawšim něhdźe 300 wopytowarjow na nimale wupředatej žurli wulkeho domu institucije zahoriła. Kruch z pjera Lubiny Hajduk-Veljkowićoweje wotbłyšćuje stawizny „prěnjeje serbskeje beat-band“ Hercy, złožowacy so předewšěm na dopominanja originalnych čłonow skupiny. Po „intensiwnej rešerši“ bě awtorka na tym zakładźe realne a fiktiwne elementy do scenarija zjimała, kajkiž je intendant NSLDź Lutz Hillmann takrjec jako kolažu po wašnju listowanja w fotowym albumje inscenował. Swětowe historiske podawki, kaž na přikład „Praske nalěćo“, tak mjenowany napřemoběh na měsačk a přizemjenje prěnjeho čłowjeka na nim, mjez druhim sposrědkowane z widejowymi projekcijemi, tworja pozadk za biografiju młodych hudźbnikow.