Serbska rada: Puć z Janšojc do Delnjoserbskeho gymnazija wolóžić!

Choćebuz (SN/at). Kubłanske temy su posedźenje braniborskeje Rady za naležnosće Serbow wčera w Choćebuskim Delnjoserbskim gymnaziju (DSG) postajowali. Schadźowanišćo bě wotpohladnje wu­zwolene, zo bychu so na posedźenju wobdźěleni swójski wobraz wo połoženju na jónkrótnym delnjoserbskim kubłanišću wutworili.

Šulski nawoda dr. Matthias Guttke informowaše nastupajo rólu DSG jako specialna šula ze serbskim profilom za přeběh serbskich kubłanskich biografijow. Wučerki a wučerjo nimaja jenož na wědu nawjazać, kotruž wuknjacy ze zakładnych šulow do 5. resp. 7. lětnika DSG sobu přinjesu, ale jich k abiturje přewodźeć. Zrałosć za studij twori přechod do pozdźišeho powołanja. „Wopyt delnjoserbskeho gymnazija njerěka jeno, sej serbšćinu jako cuzu rěč přiswojić, ale zdobom so do serbskeje kultury zanurić.“