Budyšin (SN/bn). Pod hesłom „W fokusu: Detlef Kobjela“ je Serbski ludowy ansambl wčera wopominanske rozmołwne koło składnostnje 80. narodnin swojeho něhdyšeho intendanta a wjelelětneho dramaturga wuhotował. Na žurli SLA sposrědkowachu dohromady šěsć rowjenkow wuznamneho komponista něhdźe 40 zajimcam swoje wosobinske dožiwjenja a nazhonjenja z „přewšo přećelnym a skromnym čłowjekom“, kaž jeho bjez rozdźěla wopisowachu. Žurnalist Alfons Wićaz mjenowaše Kobjelu „přećela hižo z šulskeho časa“ a přeradźi, zo rěkachu jemu na tehdyšej Serbskej rozšěrjenej wyšej šuli w Choćebuzu „Mozarta“.

Něhdyši šefredaktor Noweje doby Sieghard Kozel wopisowaše komponista jako „sprawneho a wotewrjeneho přećela“, kiž bě jemu „najwažniši sobuwojowar na dobro Serbow“ a – hladajo na politiski angažement Kobjele – „najbóle socialistiski njesocialist, kiž bě stajnje kritiski a sej lěpšinow a njelěpšinow kulturneje politiki w Němskej demokratiskej republice wědomy“.