Inscenacija Thespis-centruma z jasnym aktualnym poćahom

Budyšin (los/SN). „Der Club der geheimen Sorben – Klub potajnych Serbow“ je titul inscenacije, kotraž měješe předwčerawšim, srjedu, na wupředatej žurli Budyskeho Dźiwadła na hrodźe premjeru. Połni napjatosće sćěhowachu přihladowarjo jewišćowej produkciji, kotraž běše jako „moderna, anti-utopiska bajka z dalokeho přichoda“ připowědźena.

Wona powěda wo tym, kak ćmowa móc knjejstwo w Sakskej přewozmje a ludźi, kotřiž smědźa jenož hišće arisko-němscy być, terorizuja. Wšitke dalše rěče, nałožki a tradicije su zakazane. Ludźo su nuzowani tablety brać, zo „bychu swětłu kožu dóstali“, a kóždeho, kiž so tomu spjećuje, přeměnja mócnarjo na kamjeń.

Přećiwo tomu so skupina serbskich dźěći a młodostnych z kuzłarjom po boku wobara. Woni so w tajnym zwjazku wo to prócuja serbski swět wumóžić. ­Duchi sydom serbskich kralow so z nimi zwjazuja. Z jich pomocu měło so poradźić nad ćmowymi mocami dobyć.