Budyšin (SN/bn). Na połnje wobsadźenej žurli Serbskeho ludoweho ansambla předstaji dohromady 19 wobdźělnikow mjeztym pjaty raz wuhotowanych „Prózdninow z instrumentom“ minjeny pjatk w tydźenju po jutrach nazwučowane kruchi. Pod nawodom Jana Brězana, kiž tele zastojnstwo na dobro dorosta w starobje dźesać do 14 lět třeći raz wukonješe, zahra po wašnju bigband zestajeny orchester sadźby, kotrež bě Christoph Reuter na zakładźe serbskich ludowych spěwow ekstra za młodych hudźbnikow spisał. Tak zaklinčachu mjez druhim wobdźěłanej pěsni „Kelkož kapkow, telko lět“ a „Slěpe, to jo rjana wjeska“. Wjacori wobdźělnicy, mjez druhim Karolina Kirsten (cello) a Benjamin Meyer (pozawna), sposrědkowachu nimo toho solistiske přinoški, při čimž so tak mjenowana klasiska hudźba runje tak jewješe kaž načasne popowe štučki. Jako přidawk předstaji sydom čłonow orchestra „Seven nation army“, drje najznaćiši hit skupiny The White Stripes.