Rom/Vatikan (SN/MG). Z Božej mšu zahajichu kardinalojo we Vatikanje wčera, srjedu, dopołdnja konklawe we Vatikanje. Na mši wo to prošachu, zo bychu praweho naslědnika swjateho Pětra wuzwolili. Dohromady 133 muži smě přichodneho bamža w prastarej ceremoniji wolić. To je telko, kaž hišće ženje do toho.

Dokelž je lěto 2025 tež swjate lěto, mjerwja so w Romje tuchwilu z putnikami a turistami. Stwy w hotelach a křesćanskich hóstnych domach su nimale wšě wuknihowane. Tuž njezadźiwa, zo přebywaše wčera popołdnju, po tym zo běchu kardinalojo do Sixtinskeje kapały zaćahnyli, wjele ludźi na Pětrowym naměsće. Tam čakachu na wuslědk prěnjeho wólbneho koła. Kardinalojo su mjenujcy wčera hižo prěni raz wolili. Dźensa wola dalše štyri razy, jeli so njedojednaja, a tež pjatk tak postupuja. Po třoch dnjach předpisaja jim regule cyły dźeń přestawki, potom maja dale wolić. Naposledk trjeba nowy bamž wjetšinu dweju třećinow, doniž njeje tuta docpěta, njesmědźa kardinalojo Vatikan wopušćić.