Łužiske lodohokejowe liški su sej za přichodnu sezonu w DEL2 słužby kanadiskeho nadběhowarja Chrisa Theodore zawěsćili. 27lětny lěwicar přińdźe z francoskeje Ligue Magnus do Běłeje Wody a přinjese mjezynarodne nazhonjenje kaž tež wysoku hrajnu inteligencu sobu do Łužicy. W Beaconsfield rodźeny Kanadźan je 1,73 m wulki a 84 kilogramow ćežki. Wón je znaty za swój dynamiski hrajny stil. Wosebje w rozsudnych wokomikach pokaza so Theodore stajnje prezentny. Tójšto rozsudnych wrotow, tak mjenowa game-winning goals, rěča za sebje. Swoje wukubłanje měješe Theodore w sewjeroameriskej collegelize NCAA. Tam hraješe wón cyłkownje za tři renoměrowane teamy:

W sezonje 2021/22 hraje wón w American International College (AIC). Z 29 dypkami (10 wrotow, 19 asistow) w 35 hrach bu jako lodohokejist lěta w Atlantic Hockey Conference wuzwoleny.

W slědowacej hrajnej dobje zběraše dalše nazhonjenja w Union College a bě znowa kruty wobstatk teama.

Swoje kónčne lěto absolwowaše Theodore 2023/24 pola Catamounts při University of Vermont, hdźež wón ze 14 dypkami w 30 hrach znowa swoju kwalitu dopokaza.