Wuradźuja wo předźěłanym měrowym planje za skónčenje wójny w Ukrainje
London (dpa/SN). Předźěłanu wersiju měroweho plana USA za skónčenje wójny w Ukrainje su po informacijach statneho nawodnistwa w Kijewje dźensa we Washingtonje přepodać chcyli. Wot knježerstwa USA zdźěłany měrowy plan su wot 28 na 20 dypkow skrótšili, prezident Wolodymyr Zelenskyj ukrainskim žurnalistam zdźěli. „Ukrainje napřećo njepřećelsce zmyslene pozicije smy wušmórnyli“, wón rjekny.
Zo Ukraina Ruskej kónčiny swojeho kraja přewostaji – štož je wosebje łoskoćiwy dypk w rozmołwach wo móžnym měrowym rozrisanju – Zelenskyj dale raznje wotpokazuje. „Nimamy po zakonju žane prawo k tomu, tež po ludowym prawje nic“, jeho agentura Interfax cituje. Ruska porno tomu dale na tym wobstawa, sej kónčiny na wuchodźe Ukrainy přiswojić.
