Politiska popjelna srjeda w Budyšinje z regionalno-europskim ćežišćom

Budyšin (SN/bn). Mjeztym 32. raz wotmě so wčera Politiska popjelna srjeda w Budyšinje. Zapósłanc Sakskeho krajneho sejma Marko Šiman (CDU) powita jako hosćićel wopytowarjow na nimale połnje wobsadźenej žurli měšćanskeje hale „Króna“. Wosebje wuzběhny wón wjacorych, zdźěla bywšich zastupjerjow zwjazkoweho kaž tež krajneho sejma, reprezentantow lokalneho resp. regionalneho hospodarstwa, prawnistwa a kulturneho kaž tež zjawneho towaršnostneho žiwjenja a nic naposledk kopicu sponsorow zarjadowanja. Jako čestneju hosćow a rěčnikow předstaji wón wulkopósłanca Čěskeje Jiříja Čisteckého a předsydu frakcije CDU w Sakskim krajnym sejmje Christiana Hartmanna. W swojej slědowacej narěči wěnowaše so Šiman mjez druhim kritisce „procesej centralizacije“, kotryž je wuslědk noworjadowanja rozdźělenja srědkow EU přez knježerstwa jednotliwych statow.